ارفع شعار انا مش زيهم

السلام عليكم ورحمة الله وبركاته ......القصه دي انا قراتها وحبيت انكم تستفيدوا بيها معايا

إخوانى واخواتي فى الله

دول شوية كلام لقيتهم ع النت واقتنعت بيهم فقولت أجيبهملكم نستفيد كلنا

والله المستعان وعليه التكلان

بسم الله الرحمن الرحيم

من
يجي خمس سنين كدة, كنت ماشية انا وواحدة صحابتي (بعيد عنكوا دي واحدة
متزمتة اوي وواخدة الإسلام قفش.. وهتعرفوا ليه دلوقتي) فقابلت ابن خالتي
واحنا ماشيين.. وطبعا جه وسلم عليا و اديناها فايف بالإيد وازيك وعامل اية
وبيس يا معلم ماشي يا مان يلا تشاو بقى..

وبعد ما مشي الاقي صاحبتي دي قلبتلي الوش التاني وبتقولي اية اللى انتي عملتيه دة؟؟؟

قولتها على اية؟؟ على يا معلم ولا يا مان؟؟

قالتلي: لأ طبعا انا اقصد على ايدك

قلتلها: مالها ايدي زي الفل وحلوة اهى

قالتلي: انتي ازاي تسلمي على ابن خالتك بإيدك؟؟ هو كان اخوكي ولا حد من محارمك؟؟

فقلتلها: لية يعني هو انا عملت حاجة غلط؟؟ شفتيني خدته بالحضن ورزعتله بوستين على خده ولا اية؟

لقيتها زعلت مني وقالتي يا آية خالي بالك السلام بالإيد حرااام.. مباح ليكي بس محارمك وزوجك وطبعا كل النساء وبس..

و
عشان العشرة اللي بينا فقلبت الموضوع على طول وغيرته عشان منخسرش بعض..
والصراحة كنت بشتمها من جوايا بقول "تييييييييييييييييييت" (الشيتمة
محذوفة عشان الرقابة معلش) واتخميت فيكي كنت فاكراكي واحدة كويسة مش مكلكعة

وعدا اليوم على خير

لأ

معداش على خير

فى
نفس اليوم وصلي ايميل من واحدة صاحبتي.. فيه رغي كدة كتير.. بس اللي فهمته
فى الآخر انه بيقول السلام بالإيد حرام.. قلت بصوت عالي
"تيييييييييييييييييييييييييييت" (معلش اتشالت الشتيمة برضه عشان الرقابة) حتى كمان الدين بقوا يألفوا فيه وكل يوم يطلعولنا فتوى جديدة... حاجة تقرف!

وعدت الأيام ...

مفيش
شهر كدة ولقيت واحدة صاحبتي(بحبها اوي) بتقولي انها لقت مسجد حلو فيه
تحفيظ قرآن والناس اللي فيه حلوين اوي ومش متشددين خالص.. ورحت معاها..

وكانت المفاجأة الكبري

اول ما دخلنا لقينا بعد شوية واحدة دخلت علينا

لابسة نقاب

ولما شالت النقاب لقيتها كانت بتبتسم لينا وبتقولنا انا "فلانة" وان شاء الله انا اللي هكون معاكوا واساعدكوا فى حفظ القرآن

انا
مقدرتش امسك نفسي وضربت صاحبتي (وهو محدش واخد باله) وقرستها وكتبتلها فى
ورقة "الله يخرب بيتك جايبالي واحدة منتقبة تحفظنا.. هو احنا ناقصين حد
يقولنا كل شوية حرام وحلال.. منك لله"

واتاريني يا عيني كنت ظالمة صاحبتي دي.. دي هي نفسها مكانتش تعرف ان اللي هتحفظنا منتقبة.. دي كانت فاكرة انه شيخ اللي هيحفظنا..

انا
عمري ما كنت اتعاملت مع منتقبة قبل كدة.. وكنت واخدة عنهم صورة وحشة اوي
(التشدد فى الدين واسلوب مش كويس فى الكلام دة غير ان فى منهم من برة هلا
هلا ومن جوة يعلم الله).. لكن طنط دي غيرتلي كل الصور اللي كانت فى دماغي
وخليتني احب كل المنتقبات من اسلوبها الجميل معانا ربنا يباركلها يارب..

يوووه
خرجنا عن الموضوع.. المهم ..انا حبيت طنط دي اوي.. وفي مرة واحنا قاعدين
معاها فى المسجد جه فى دماغي اللي قالتهولي صاحبتي على موضوع السلام دة
والإيميل اللي جالي.. سبحان الله.. فقلت لطنط: يا طنط هو السلام بالإيد
حرام؟؟

قالتلي لأ

قلت فى نفسي "هييييييييييه ظهر الحق"

كملت
كلامها: بس حرام انك تسلمي على اى حد غير محارمك وزوجك والنساء كلهم.. حد
غير التلاتة دول يبقى حرام لأنه يعتبر كأنه لمس خدك.. ترضي ان ولد يحط
ايديه على خدك؟؟ طبعا لأ وغير كمان متعرفيش نية اللي قدامك اية من انه
يلمس ايدك

مرضتش اتناقش معاها اكتر من كدة عشان متفقعليش المرارة..

اية
اللي بيحصل فى الزمن دة ياخوانا.. هو كل واحد بقى يطلعله بفتوي كدة ليه؟؟
مالها لما اسلم على ابن خالتي يعني بالإيد؟؟ مانا نيتي حلوة اهى.. وماله
قريبي ماهو عمره ما هتكون نيته غلط ناحيتي واكتر واحد هيخاف عليا يبقى
حرام فى اية بقى؟!!! عالم تشل صحيح..

الموضوع فضل فى دماغي معشش
كدة وقلت: انا والعالم دي والزمن طويل.. وانا هجيبلهم من القرآن والسنة ان
السلام بالإيد لا حرام ولا حاجة... اومال كانوا زمان بيسلموا على بعض
ازاي؟ الاسلكي؟؟

ودورت فى كل حتة.. فى الإنترنت والمكتبة ولأول مرة
فى حياتي كنت امسك كتاب كبيييير كدة وتخييين واقرأ فيه.. آة والله مانا
لازم اثبت لهم انهم عالم نصابة وهيعقدوا الناس فى الدين

بس الموضوع طلع اكبر من كدة بكتير..

دة
طلع ان فى حديث بيقول "لإن يُطعن في رأس أحدكم بمخيط من حديد، خير من أن
يمسّ امرأة لا تحلّ له" وفى رواية تانية بتقول " من ان يمس امرأة أجنبية"
(اجنبية يعني مش محرمة عليك اومش زوجتك وكدة يعني لكن مش معناها واحدة
جاية من أمريكا او الهند)

عارفين معني الحديث دة اييييييييية؟؟؟
يعني دماغي يدخل فيها حديد كدة من كل حتة واتعذب وهو بيدخل فى دماغي والدم
يطلع من كل حتة واحس بيه وهو بيدخل هيكون افضل اني اسلم على اى راجل مش
محرم عليا.. نهار ابيض!!

برضه مسكتش وحاولت بطرق رهيبة جدا
احاول اشوف اى دليل يثبت ضعف الحديث دة.. بس اتقلبت عليا اني الاقي ادلة
زيادة تحرم المصافحة زي ان النساء زمان لما كانوا بيبايعوا الرسول عليه
الصلاة والسلام فمكانش بيسلم عليهم بالإيد ويكتفي بالكلام بس

قالت عائشة رضي الله عنها: " ما مست يد رسول الله صلى الله عليه وسلم يد امرأة قط ما كان يبايعهن إلا بالكلام "

عن
أميمة بنت رقيقة رضي الله عنها قالت: "أتيت رسول الله صلى الله عليه وسلم
في نساء لنبايعه، فأخذ علينا ما في القرآن: "أن لا يشركن بالله شيئاً.."
وقال: فيما استطعتن وأطقتن؛ قلنا: الله ورسوله أرحم بنا من أنفسنا؛ قلنا:
يا رسول الله: ألا تصافحنا؟ قال: إني لا أصافح النساء"

واتحداكوا لو تجيبولي دليل واحد ان الرسول عليه الصلاة والسلام اباح للرجال يسلموا على النساء عادي كدة بالإيد زي ما بنعمل دلوقتي

المهم
لما اتأكدت ان السلام حرام بقى بجد فنفضت و كّبرت وقلت ماشي خلاص عادي
يعني ماحنا كل يوم بنعمل حاجات كتير حرام جت على دي؟ وبعدين احنا اتربينا
على كدة انه عادي وزماننا غير زمن الرسول (ص) والناس بتتغير و...الخ

بس
انا كنت غلط... احنا لما بنفضل نكّبر نكّبر على كل غلطة بنعملها يوميا فى
حياتنا ونقول عادي ما احنا اتعودنا واتربينا على كدة وزماننا غير زمن
غيرنا بيفكرني بالظبط بموقف سيدنا إبراهيم مع ابيه وقومه لما كانوا يعملوا
العملة ويقولوا انهم شافوا آبائهم وأجدادهم كدة فأكيد هيعملوا زيهم..
وطبعا فى الآخر هتتكون علينا الذنوب دي ونلاقيها كلعكيعة كبيرة وتكون سبب
فى عدم دخولنا الجنة(بعد الشر اللهم ارزقنا الفردوس الأعلي... ما تقولوا
آمين).

الموضوع كبير اوي.. احنا من اول ما اتولدنا متعودين
اني لما اسلم على حد على حد بيكون بالإيد.. لا احنا عايزين ننسى الحاجة دي
اللي اتربينا عليها ونرجع شوية لورا ونتفكر ان الرسول (ص) قالنا لأ منسلمش
الا على المحارم والنساء وزوجي بس.. اما لو راجل فيسلم على الرجال ومحارمه
وزوجته بس.. بنت خالته لأ.. بنت عمته لأ..خطيبته لأ.. البوص بتاعته لأ..
بنت اخت جارته لأ.. المحارم بس..

احنا مش كل واحد فينا
بيقول عايز يعمل حاجة لدينه؟؟ وكل واحد فينا نفسه يكون انسان ملتزم بجد؟
طب ورينا بقى.. يلا نبتدي اول السكة.. وادي اول اختبار اهو.. عرفت ان
الرسول قالك متسلمش على بنات.. هتسلم؟؟

لازم نقرر من اللحظة دي
نقول لأاااا مش هسلم على اى بنت بالإيد.. والبنات تقول لأ مش هسلم على اى
ولد بالإيد.. عايزين نرجع للدين بتاعنا صح :'(

انا غلطت فى صاحبتي
الأولانية دي وكنت فاكرة انها معقدة ومكلكعة.. لكن كان عندها حق.. احنا
اللي شايفين ان كل واحد بيرجع للدين بجد اللي نزل على رسولنا ويمشي عليه
صح يبقى واحد مكلكع ومعقد

والحمدلله من ساعتها وانا مبطلة سلام خالص لا قريب ولا غريب.. ومن منطلق اللي شوفته:

نفترض ان انا دلوقتي ربنا كرمني ونويت اني عايزة ابطل سلام على ولاد وانت نويت متسلمش بالإيد على بنات فتعمل اييية؟؟

اعمل زي ما الرسول (ص) كان بيعمل.. كان بيسلم بالكلام بس.. او بيحرك ايديه كأنه بيسلم.. و ادي دليل عشان متفتكروش اني بتبلى عليكوا:

عن
أسماء بنت يزيد رضي الله عنها قالت: "أن رسول الله صلى الله عليه وسلم مر
في المسجد يوماً وعصبة من النساء قعود، فألوى يده بالتسليم"

طيب
دلوقتي ربنا كرمك وخلاص مش عايز تسلم تاني بالإيد.. الناس بقى مش عارفة
انك مبقيتش تسلم ..فمن الأفضل عشان متكسفهمش لأنهم لسة ميعرفوش فحرك ايدك
كأنك بتسلم بس من بعيد واتأسف اوي وقول: انا اسف اوي يا طنط او يا فلانة
معلش اصل انا مبقيتش اسلم على بنات بالإيد"

وش كدة؟؟

آة وش كدة.. مرة على مرة هتلاقي الناس كلها عارفة وهتتعود على كدة

هتلاقي كمان ناس كتير هتقعد ترخم عليك وتقول عليك كلام دبش ورخم.. اثــــــــــــــبـــــــــت
ساعتها وقولهم وانت بتضحك وتتريق على نفسك "معلش بقى اصل انا معقد شوية
تقولوا اية واحد عبيط" .. وبما انك اتريقت على نفسك فمش هيقولوا حاجة عليك
تاني وبالعكس هيحاولوا يشوفوا سبب انك مبقتش تسلم ليه.. ومش بعيد حد منهم
ربنا يهديه وميسلمش زيك وتاخد انت الثواب..

بجد هتجرب احساس حلو اوي يوم ما تلاقي ايدك دي مبقتش تلمس ايد اى حد خالص من اللي مش مباح ليك تسلم عليهم والله ..

وخالي بالك اكبر مشكلة هتواجهها بجد هى اهلك.. والله دي هتلاقيها اكبر اختبار ولازم تعديه بعون الله..

اولا
مع والدك ووالدتك لازم تفهمهم بالراحة وجهة نظرك واللي انت عرفته عن
الموضوع دة.. هتلاقي حاجة من اتنين: الأول يا اما هيستجيبوا لكلامك يبقى
خير وبركة.. والتانية هيطلعوا عليك بالشبشب ويقول الواد بقى تبع الإخوان..
ساعتها ارضيهم بكلمتين حلوين وبرضه متبقاش تسلم.. ولو شافوك مرة مش بتسلم
على قريبتك فقولهم ايديها شكلها مش عاجبني لما تغسلها كويس هبقى اسلم
عليها... اى حجة طلعها لغاية ما تبقى تقعد معاهم تاني وتفهمهم الموضوع ولا
تيأس خاااالص...

اما عن قرايبك اللي فى سنك وصحابك فاضحك كدة اوي
معاهم وقولهم "اسكوتوووووا مش انا مبقيتش اسلم على بنات.. آة والله"..
طبعا هيتخضوا وهيقولوا الواد جراله حاجة فى دماغه فانت كلمهم حلو وقولهم
السبب.. اقتنعوا يبقى اهلا وسهلا ولو مقتنعوش براحتهم.. على الأقل يفهموا
انك مبقيتش تسلم عشان ميحرجوش نفسهم بعد كدة.. وكمان انت وصلتلهم حاجة
مكانوش يعرفوها ويمكن ربنا يجعلك سبب هداية حد فيهم.

واللي يقولك عامل فيها شيخ.. فقوله: يا راااااجل وهو انا اطول اكون شيخ.. يارييييت ارفع شعار انا مش زيهم Icon_razz

اللي يديك كلمة رخمة رد عليه بس بطريقة حلوة وفي نفس الوقت تبينله انك مش هتتنازل عن قرارك بإذن الله

يا
جماعة عايزين الرسول يفرح بينا كلنا يوم ما نقابله وربنا يرضي عنا ويحبنا
اننا لما عرفنا الموضوع دة فعملنا بيه وقلنا سمعا وطاعا يا رسول الله..

ربنا يثبتنا جميعا..

[ندعوك للتسجيل في المنتدى أو التعريف بنفسك لمعاينة هذا الرابط]

جزاكى الله كل خير

وجعله فى ميزان حسناتك

تسلم ايديكى وجزاكى الله كل خيير

جزاكى الله كل خير

وجعله فى ميزان حسناتك

» ازاى ارفع من جهازى واكسب اكونتات رابيد شير
» حصريا :: أغنية محمد فؤاد - ارفع الشعار :: CDQ 256 Kbps