حتى ابليس عاطل...!!!

كان ابليس في اوضته بيلم هدومه وحاجته
وع الكوميدينو كانت استقالته ممضية ومختومة حسب الاصول
وجنبها تذكره سفر لجزر القمر

كانت ملامح وشه ساعتها لو تشوفه بجد يصعب عليك يا ولداه..
حزن وكآبة واحباط ويأس وقلة حيلة
زيادة على كده دهشة مزمنة على وشه من فترة مش قريبة يعني...
واعترف يا عيني بالعجز والفشل ابليس راحل من البلد من غير رجعه...

افرحو بقى...

ايه ياعم انت على فين بتلم فحاجتك ليه..!؟

ياراجل ماليش قعدة عندكو... انا بقالي سنين عاطل مش لاقي شغل..
دا أنا قربت اموت من الجوع .. بقولك ايه معكش سجارة..؟

انا ماشي وسيبهالكم مخضرة
ولا هسيبلكو لا وسواس ولا خناس

كنت زمان اوسوس للوحدة تسيب ابنها يعيط وترغي مع جارتها
دلوقت بقو لوحدهم عيالهم مرميين يولعو وهي ع النت وللا موبايل بتكلم الناس..

كنت اوسوس للواحد عشان ينسى يسمي قبل ماياكل..
دلوقت الواحد مش لاقي حاجه ياكلها...

اذا كان انا ابليس اتسممت من الشاورما...!!!

كنت اوسوس للشب من دول يرميله كلمة ع اللي معدية جمبه فالشارع...

بقو البنات هما اللي بيرمو كلام وربنا اتكسف انا اقوله..!!

واحد يسرقله 100 مليون عيني عينك يقومو يسجنوه في فيلا ع البحر...!!
واتنين فارشين فرشه يبيعو فيها جرجير وخس تقوم الشرطه مسكاهم ...!!

هو انت مستنيين ابليس يوسوس اصلا؟؟؟؟

ده انتو بقى عندكم فائض فساد يكفيكو 30 سنة كمان قدام...
دا انا بقيت اخاف على نفسي منكم يا عم.... !!

انا بقيت بتجبر مرات واخالف نفسي
وأوسو بالمقلوب
اقول للمسؤول ارحم
وللحرامي كفاية.. يابني سيب شويه للحرامية اللي جايين بعدك..

يعني انتو كده الله ينور لوحدكو كده عاملين كل البلاوي دي....

انا ابليس بقى ايه لزمتي معاكم..؟؟؟.

اشتغل سواق تاكسي يعني؟؟

وللا افتح سايبر وخلاص....!!!!!



بجد انا بتوقع ده حاله اليومين دول

دليل كده اني مشوفتش فساد قد اللي شوفناه فرمضان
والشياطين بتكون مصفدة ساعتها...

طب كنا بنعمل الحجات الغلط دي منين...!!!

منورين ...

الف شكر ليكم نورتم التوبيك

لف شكر ليك يانونا انا من راى يفتح سيبر ويشترك معنا فى المنتدى
على الاقل يبقى لقى حاجة يعملها تسلم ايديك يانونا منورة التوبيك